|
|
Minn Judith
Bugeja
Għeżież tfal,
Is-sajf reġa' magħna. Bdew il-vaganzi u ser ikollkom ħafna
ħin liberu fuq idejkom. Tistgħu tużawh kif tridu imma
taħluħx.
Ħafna minnkom jattendu skola sajf fejn ikollkom diversi
attivitajiet. Hemm min imbgħad jagħżel li jieħu xi kors fl-arti,
drama, jew kompjuter.
Hemm min jiddeċiedi li jieħu xi ftit lezzjonijiet
fis-suġġetti skolastiċi. Imbgħad hemm min jattendi xi forma
ta' sport.
Il-bniet jgħidu kollox sew ...is-subien għandhom fejn
jipprattikaw imma aħna qisna ma neżistux. Dan mhux minnu
għaliex dan is-sajf kien hemm taħrig fil-futbol għall-bniet
ukoll, u hemm il-ħsieb li jibqa' sejjer fix-xhur xitwin.
Mela 'girls' isa, tħajru intom ukoll !
Is-sajf; ma nistgħux ma nsemmux il-baħar. Ngħaddu ġranet
sħaħ ħdejn il-baħar u nagħmlu sew, imma għandna noqgħodu
attenti mill-qilla tax-xemx, għaliex siegħa żejda fl-eqqel
tagħha taf tagħmel hafna ħsara, jekk mhux issa, il-quddiem.
Ma nistgħux ma nsemmux il-festi u l-briju li jġibu magħhom.
Issa li riesqa l-festa, nistgħu ngħidu li l-Hamruniżi
jingħaqdu kollha taħt il-kappa tal-Patrun tagħhom, San
Gejtanu.
Għandna niċċelebraw u nattendu kemm għall-funzjonijiet li
jsiru fil-knisja kif ukoll għall-festi ta'barra. Għandna
niċċelebraw fil-paċi u mingħajr piki bejnietna. Minn hawn
nixtieq nawguralkom minn qalbi IL-FESTA T-TAJBA.
Gawdu dawn il-vaganzi imma titilqux il-ktieb minn idejkom....
Il-qari huwa ta siewi kbir. Minnu nitgħallmu nwessgħu l-imaġinazzjoni
u l-għarfien tagħna.Il-qari jgħina kemm fil-komponimenti,
fil-lingwi, kif ukoll fil-ħajja.
Mhux bilfors għandna nixtru kotba ġodda. Nistgħu nisselfu
kotba mil-libreriji pubbliċi. Illum nistgħu ngħidu li kull
kunsill lokali għandu il-libreriji tiegħu.
Minn dan l-ispunt, nixtieq nirringrazzja lis-Sur Gruppetta
(MERLIN BOOKSHOP) li jissponsorjana b'kotba sbieħ u
nteressanti li jintrebħu fil-kompetizzjonijiet.
Is-sajf it-tajjeb tfal u nerggħu niltaqgħu f'Settembru.
Judith.
KOMPETIZZJONI.
Din id-darba nixtieqkom tiktbu storja ta' madwar 200 kelma
fuq
ZAK U L-VUVUZELA
Użaw l-immaġinazzjoni tagħkom u tistgħu tagħmlu wkoll xi
tpinġijiet... eta’ sa 13-il sena.
Jingħata ktieb sabiħ għar-rebbieħ.
Il-kompetizzjoni ta' l-aħħar ħarga ntrebħet minn Bierhoff
Joseph Pisani.....Prosit ! |
|
|
