|
|
Minn Dr
Paula Mifsud Bonnici
mifbon@maltanet.net
Aktar għajnuna diretta lill-kunsilli lokali
Kemm nieħu pjaċir meta naqra u nisma’ fl-aħbarijiet illi l-Gvern
qed ikompli jirrikonoxxi kemm il-kunsilli lokali huma
bżonnjużi u indispensabbli fil-ħajja ta’ kull wieħed u waħda
minna u dan billi ikompli jagħti aktar u aktar għajnuna
lill-kunsilli lokali sabiex ikunu jistgħu jtejbu il-kwalita’
tal-ħajja tagħna. Permezz ta’ dan il-fuljett u permezz
tal-kitbiet tiegħi, nieħu pjaċir illi filwaqt illi nżommukom
infurmati b’dak kollu li jkun qed isir mill-Kunsill Lokali
Ħamrun u x’inhuma l-proġetti tagħna, nagħtukom ukoll
informazzjoni dwar dak li jkun qed jiġri fil-pajjiż kollha
f’dak li jirrigwarda l-kunsilli lokali u l-komunitajiet
tagħhom.
Dan l-aħħar il-Gvern reġa’ ħabbar għajnuna diretta ta’
€250,000 lil 15-il kunsill lokali f’Malta u f’Għawdex din
id-darba lil kunsilli lokali żgħar b’popolazzjoni ta’ inqas
minn 5,000 ruħ. Żgur li l-iskop wara din l-iskema ta’
għajnuna hu li dawn il-kunsilli jkunu megħjuna biex iwettqu
proġetti li minħabba ċ-ċokon tagħhom ikun diffiċli li dawn
jitwettqu; proġetti li jvarjaw minn proġetti ta’ restawr,
ġonna, proġetti komunitarji, proġetti li l-inizjattivi
tagħhom ikunu ġejjin direttament mill-kunsilli lokali.
Wieħed ma jistax ma jsemmix id-diversi attivitajiet li qed
jittellgħu matul is-sena kollha mid-diversi kunsilli lokali
u dan taħt l-iskema Attivitajiet Kulturali ko-fininzjata
mis-Segretarjat Parlamentari responsabbli mill-Kunsilli
Lokali u mill-MTA. Dawn l-attivitajiet, filwaqt illi
jippromwovu l-identita’ tal-lokal, qegħdin jintlaqgħu b’mod
pożittiv kemm mill-Maltin kif ukoll mit-turisti li jżuru
dawn il-lokalitajiet waqt li jkunu f’pajjiżna. Bla dubju, ic-Chocolate
Festival li sar f’Ottubru li għadda ġewwa l-Ħamrun kien
suċċess u ntlaqa’ tajjeb kemm mill-Ħamruniżi kif ukoll minn
kull min żar attenda l-attivita’. Nassigurakom illi dan il-festival
ser jibqa’ fil-kalendarju annwali tal-kunsill u din is-sena
ser ikun aħjar bl-attrazzjonijiet ikunu ferm akbar.
Ħaġa oħra li laqtitni kienet illi ġie krejat fond ieħor
speċjali għal dawk il-kunsilli lokali li għandhom ħtiġijiet
speċjali minħabba t-tip ta’ attivitaijiet nazzjonali li
jsiru fil-lokalitjiet tagħhom. Nieħdu, per eżempju, il-Belt
Valletta, minkejja li l-popolazzjoni ġewwa l-Belt tlaħħaq
biss is-7,000 ruħ, jidħlu fiha madwar 50,000 persuna. Allura
l-Gvern ħaseb sabiex jagħtihom aktar għajnuna finanzjarja
biex jgħinhom. Hekk iridu nagħmlu ġewwa l-Ħamrun għaliex l-istess,
għalkemm il-popolazzjoni tal-Ħamrun niżlet għal taħt
l-10,000 ruħ, l-ammont ta’ nies li jżuru l-Ħamrun huwa ferm
akbar u għalhekk il-ħtiġijiet tal-lokali huwa ferm akbar.
Aħna, bħala kunsill, rridu nieħdu u naħtfu dawn l-opportunitajiet
li għandna għad-disposizzjoni tagħna, biex b’hekk ikunu
nistgħu nagħmlu l-Ħamrun tagħna ferm isbaħ milli hu u r-residenti
tagħna jkunu moqdija aħjar.
Ma nistax ma nikkonkludix dan l-artiklu tiegħi billi ma
nagħmilx referenza għall-festi ġewwa l-Ħamrun. Nixtieq
nifraħ lill-Parroċċa tal-Immakulata Kunċizzjoni, l-Għaqda
Mużikali, il-Grupp Armar Festa u Għaqda Dilettanti tan-Nar
għall-mod ta’ kif il-festa tal-Immakulata Kunċizzjoni kienet
organizzata u kif din il-festa kienet verament festa ta’
għaqda u ferħ. Prosit lil kulħadd! Waslet ukoll il-festa ta’
San Gejtanu. Żgur li l-festa ta’ San Gejtanu ma tissemmix
għall-logħob ta’ nar jew għal xi kaxxa infernali madankollu
jirnexxielha kull sena tattira eluf kbar ta’ nies. F’dawn
il-ġranet, il-kunsill lokali tal-Ħamrun ikun impenjat
flimkien mal-Kappillan, iż-żewġ Soċjetajiet Mużikali,
il-Pulizija u tant u tant nies oħra sabiex naraw illi kollox
jimxi sew u li l-festa tkun waħda ta’ suċċess. Filwaqt li
nawgura l-festa t-tajba lil kulħadd, j’Alla illi l-ispirtu
reliġjuż jibqa’ jipprevali fuq kollox għaliex huwa biss
b’dan l-ispirtu illi verament wieħed ikun jista’ jgawdi l-festa
tal-patrun tiegħu bl-aktar mod dinjuż imżewqa bil-briju
tal-marċi sbieħ li tant u tant jafu janimaw din il-festa. |
|
|
